Арман Царукян икки потенциал рақибини эълон қилди

Асли арманистонлик аралаш яккакураш устаси кейинги рақиби бразилиялик Чарльз Оливейра ёки франциялик Бенуа Сен-Дени бўлиши ҳақидаги маълумотни тасдиқлади. У WBC бўйича ярим ўрта вазн тоифасида жаҳон чемпиони Райан Гарсия билан суҳбатда маълум қилди.

"Мен Чарльз Оливейра ёки Бенуа Сен-Дени билан жанг қилмоқчиман. Икки вариантдан яхшироғи Чарльз. Унинг исми бор ва биз аллақачон жанг қилганмиз - уни мағлуб этганман. Ҳозир унда BMF камари бор. Бу камар унга тўғри келмайди, лекин менга керак - уни олиб кетмоқчиман", - деди Арман.

Аввалроқ, Царукян 14 июнь куни Илия Топурия ва Жастин Гэтжи ўртасидаги бирлаштирувчи чемпионлик жангини суғурта қилмоқчи эканлигини маълум қилган эди. Айни пайтда Чарльз Оливейра ва Бенуа Сен-Дени UFC енгил вазн тоифаси рейтингида мос равишда учинчи ва бешинчи ўринни эгаллаб турибди.