Арман Царукян: "Мен жуда хавфлиман, буни Дана билади"

"Аслида мен чемпионлик учун жанг қилишим керак эди, аммо UFC менга тўғридан-тўғри айтди: биз сени Paramount билан битимнинг биринчи кардига қўя олмаймиз, чунки сен жуда хавфли экансан. Гўёки, мен тасодифан кимгадир бош билан зарба беришим, жангдан бош тортишим ёки мухлисни ранжитишим ҳам мумкин экан. Кутиш кераклигини айтишди", - деди Арман блогер Адин Росснинг подкастида.

Эслатиб ўтамиз, 24 январь куни Лас-Вегасда енгил вазн тоифасида вақтинчалик чемпионлик камари учун Пэдди Пимблетт ва Жастин Гэтжи ўзаро куч синашади. Амалдаги UFC чемпиони Илия Топурия эса оилавий шароити туфайли фаолиятини вақтинча тўхтатган.

UFC президенти Дана Уайт Арман Царукянни ўзига берилган имкониятдан фойдалана олмаганликда айблаб, энди чемпионлик жанги учун навбатга туришини айтиб келмоқда. Арман ўтган йилнинг бошида Ислам Махачевга қарши октагонга чиқиши керак эди, аммо ўшанда у бел жароҳати туфайли жангга бир кун қолганида сафдан чиққанди.