Арсен Венгер офсайднинг бутунлай янгича қоидасини таклиф қилмоқда

ФИФАнинг футболни ривожлантириш бўлими раҳбари бўлиб фаолият олиб бораётган таниқли собиқ мураббий Арсен Венгер ўйиндан ташқари ҳолатни аниқлашнинг янгича услубини футболга олиб киришни таклиф қилмоқда. 

Венгернинг ғоясига кўра, қачонки ҳужумчи бутун танаси билан ҳимоячидан олдинлаб кетган тақдирдагина, ўйиндан ташқари ҳолат қайд этилиши керак. 

The Times берган маълумотга кўра, Венгер футбол қоидаларига жавоб беришувчи Халқаро футбол ассоциациялари кенгашига ушбу ғояни таклиф қилишни режа қилмоқда. Собиқ мураббий Швеция, Италия ва Нидерландияда ўтказилган текширувлар орқали бу ғояни синовдан ўтказган.

Арсен Венгер ушбу ўзгаришни тезроқ амалга ошириш керак деб ҳисобламоқда. Бироқ, бу янгиликка ҳамма ҳам рози эмас. Масалан, УЕФА футбол кенгаши раҳбари Луиш Фигу ушбу ғояга шубҳа билан қарамоқда. Халқаро футбол ассоциациялари кенгаши эса бу усулни дастлаб VAR бор турнирларда синаб кўриш керак деб ҳисоблайди.