Australian Open. Қуръа ташланди, Истоминнинг рақиби маълум

Бугун йилнинг тўртта нуфузли турнирининг дастлабкисида саралаш баҳслари якунланиб, асосий тўрга йўлланма олган барча теннисчилар маълум бўлди.

Дунёнинг 128 нафар сараланган ракетка усталари қаторида ҳамюртиз Денис Истомин ҳам Австралия Очиқ чемпионатининг асосий тўрида иштирок этади.

Қуръа натижасига кўра, мамлакатимизнинг биринчи ракеткаси илк даврада хорватиялик Иван Додигга қарши кортга чиқадиган бўлди. Бу учрашув ғолиби иккинчи босқичда катта эҳтимол билан дунёнинг иккинчи ракеткаси, сербиялик Новак Жокович билан тўқнаш келади.

Таққослаш учун, 30 ёшли Денис Истомин дунё рейтингида 119, 32 ёшли Додиг эса 153-ўринни эгаллаб турибди. Истомин Австралия Очиқ чемпионатида юбилей 10-маротаба иштирок этади.