Азизжон Камилов ва Мариус Визер Ўзбекистон дзюдоси истиқболини муҳокама қилишди

Токио Олимпиадасининг муҳим рейтинг очколари ўйналган йилнинг ушбу нуфузли мусобақасида Ўзбекистон терма жамоаси ҳам муносиб тарзда иштирок этди. Дзюдочиларимиз якунда 1 та олтин, 2 та кумуш, 2 та бронза медалини қўлга киритиб, Осиё ва Океаниянинг 40 иштирокчи давлати орасида 6-ўринни банд этишди.

Бундан ташқари, Ўзбекистон дзюдо федерацияси раҳбарияти Осиё чемпионати доирасида бир қатор расмий учрашувлар ҳам ўтказди. Хусусан, федерация президенти Азизжон Камилов Дубай шаҳрида БАА дзюдо, спорт курашлари ҳамда кикбоксинг федерациялари президенти Муҳаммад Бин Талуб Ал Дерия билан учрашган эди. 

Осиё чемпионати доирасидаги яна бир эътиборга молик учрашув Фужайра шаҳрида Халқаро дзюдо федерацияси президенти Мариус Визер билан бўлиб ўтди. Ўзаро суҳбат чоғида жаноб Визер мамлакатимиз дзюдочиларининг халқаро аренада эришаётган муваффақиятлари, Ўзбекистон мезбонлик қилаётган нуфузли халқаро мусобақаларнинг юқори савияда ташкил этилаётгани ва бу билан юртимиз бутунжаҳон дзюдо ривожига муносиб хисса қўшиб келаётганини алоҳида эътироф этди.

Учрашув сўнггида келажакда ҳам Ўзбекистон ва Халқаро дзюдо федерацияси ўртасида кенг кўламдаги ҳамкорлик давом эттирилиши таъкидланди. Мариус Визер ўз сўзида Ўзбекистон бемалол қитъа ва жаҳон чемпионатларини ўтказа олишини урғулади.