Баҳодир Жалолов жаҳон чемпионатидаги мезбонлик масъулияти, тайёргарлик ва асосий рақиблар ҳақида гапирди

"Тайёргарлик яхши, йигитларнинг кайфияти аъло даражада. Украина, Россия ва Хорватиядан менга спаррингларда ёрдам бериш учун кучли боксчилар олиб келинди. Шу боксчилар билан яхши спарринглар ўтказдик. Жаҳон чемпионатида қўлимиздан келган ишни қиламиз, қолгани Аллоҳдан. 

Масъулият жуда катта. Биз кўпроқ медаль олишимиз керак, умумжамоа ҳисобида ҳам биринчи бўлишимиз зарур. Бу бизни энг катта мақсадимиз. Биз фақат олтин медаль учун рингга чиқамиз. Бошқаси қизиқтирмайди. Ҳар бир вазнда кучли боксчиларимиз бор. Ҳар биримизда олтин медални қўлга киритиш имконияти мавжуд. Биз яхши спорт формасидамиз, лекин биринчи бўлишимиз учун аввало руҳий жиҳатдан тайёр бўлишимиз керак. Спортчи ажойиб формада бўлса ҳам, унинг психологияси тайёр бўлмаса, ҳеч нарса қила олмайди, деб ўйлайман. 

Россия ва қозоғистонлик боксчилар менга асосий рақобатчи бўлиши мумкин. Кучли боксчилар кўп, айниқса Европада. Менга рақибнинг аҳамияти йўқ. Ким билан бўлса ҳам Аллоҳга таваккал қилиб рингга чиқамиз. 

Албатта, ўз уйингда деворлар ҳам ёрдам беради, лекин маъсулият ҳам юқори бўлади. Чунки ўз халқимиз олдида жанг қиламиз. Бокс осон спорт эмас - битта зарба ҳаммасини ҳал қилиб қўяди. Эҳтиёткорлик билан ишлашимиз шарт. Сабаби, ўз уйимиздамиз. Айниқса менга - оғир вазнда, эҳтиёткорлик муҳим. Иложи борича, турли тарафларга чалғимасдан мақсадимиз сари тўғри йўлда боришимиз керак", - деди Жалолов.