Bellator 215: Харитоновни замбилда олиб чиқиб кетишди, жанг ўтказилмаган деб топилди ФОТО+ВИДЕО

Оқшомнинг марказий жанги супероғир вазн тоифасида американец Мэтт Митрион ҳамда россиялик Сергей Харитонов ўртасида бўлиб ўтди. Жанг кутилганидан анча аввал якунланди. Мэтт лоукик зарбасини бераман деб рақибининг белдан пастги қисмига зарба йўллаб қўйди. 

Натижадан Харитоновни баҳсдан давом эттира олмади. Уни замбилда октагондан олиб чиқиб кетишди. Америкалик спортчи дарҳол россиялик рақиби ва мухлислардан узр сўради. Ташкилотчилар бу жангни ўтказилмаган, деб топишди. 

Маълумот учун, 38 ёшли Харитонов MMAда 28та ғалабага эришган. Ҳисобида 6та мағлубият бор. У ўзининг бундан аввалги жангини 2018 йилнинг октябрь ойида Bellator 207 турнири доирасида ўтказиб, рақиби Рой Нельсонни биринчи раундда техник нокаут эвазига мағлуб этган эди. 

40 ёшли Митрион эса фаолияти давомида 13та ғалаба қайд этган. Харитонов сингари 6та жангда мағлубият аламини тотиб кўрган. Мэтт Bellator 207 турнирида америкалик Райан Бэйдерга ютқазиб қўйганди.