Собиқ Bellator чемпиони Патрисио "Питбуль" UFC жангчисига айланди

Питбуль ярименгил вазн тоифасида собиқ Bellator чемпиони ҳисобланади. Патрисио Фрейре бир ойча аввал PFL (Bellator промоушенининг янги эгаси) лигаси билан хайрлашиб, эркин агентга айланганди. У узоқ вақт ишсиз қолиб кетмади ва UFC билан шартнома имзолади.

Маълумот учун, Фрейре 2010 йилдан бери Bellator лигаси байроғи остида ўз жангларини ўтказиб келаётганди. Ушбу лигада у 30 та жанг ўтказиб, ўзига хос рекорд ўрнатган. Жами 15 та чемпионлик жангларида октагонга чиққан. 2019 йилда Патрисио енгил вазн тоифасида ҳам Bellator чемпиони бўлганди. Ўшанда у биринчи раунднинг ўзида ҳозир UFC`да ўз жангларини ўтказиб келаётган Майкл Чендлерни нокаутга учратган эди. 

"Питбуль" асосий мақсади UFC ярименгил вазн тоифасида чемпион бўлиш эканини айтиб улгурди. Дебют жангидаёқ Алжамейн Стерлинг, Диего Лопес ёки Александр Волкановскига қарши октагонга чиқмоқчи.