Bellator 283. Усман Нурмагомедов навбатдаги жангини ўтказди + ФОТОГАЛЕРЕЯ

Bellator 283 оқшомининг асосий кардида енгил вазн тоифасида ўз жангларини ўтказиб келаётган россиялик 24 ёшли Усман Нурмагомедов америкалик 30 ёшли Кристофер Гонсалесга қарши октагонга кўтарилди.

Жанг биринчи раунднинг 2-дақиқаси 54-сонияси ўтиб бораётган бир паллада тўхтатилди. Усман рақибини бўғиш (гильотина) усули билан мағлубиятга учратди. Жанг асосан тик ҳолатда кечаётганди. Лекин базаси курашчи бўлган Гонсалес клинчга борди ва бу ҳолат унга қимматга тушди. Хабибнинг таълимини олган Усман Кристоферни бўғиб қўйди. 

Шу тариқа, Усман Нурмагомедов Bellator промоушенидаги қаторасига тўртинчи ғалабасини қўлга киритди. Жанглардан учтасида рақибларини муддатидан аввал мағлуб этган. Бу унинг ММАдаги 15-ғалабаси бўлди. Дуранг ва мағлубият йўқ. Гонсалес эса бугун иккинчи мағлубиятини қабул қилиб олди. Ҳисобидаги ғалабалар сони 7 талигича қолди.