Бенавидес Рамиресни тўхтатди ва Канелога "вызов" ташлади

Оқшомнинг асосий жанги биринчи оғир вазн тоифасида ўтказилди, унда Хильберто Рамирес ва Дэвид Бенавидес ўзаро тўқнаш келди. Дэвид Бенавидес биринчи оғир вазн тоифасидаги дебютини муваффақиятли якунлади. Бунинг учун унга олти раунд керак бўлди.

Америкалик ўзининг собиқ спарринг шериги Хильберто Рамиресга боксдан сабоқ бериб қўйди. Бу билан у мексикалик боксчидан ушбу вазн тоифасидаги WBA ва WBO чемпионлик камарларини тортиб олди. Ўнг кўзи деярли тўлиқ ёпилиб қолган Рамирес олтинчи раунд тугашига бир сония қолганида таслим бўлди. Бу мексикалик учун 16 йиллик профессионал фаолиятидаги биринчи нокаут бўлди.

29 ёшли Дэвид Бенавидес учинчи вазн тоифасида чемпион бўлди ва ҳали ҳам ярим оғир вазн тоифасида WBC чемпионлик камарига эга. У бу вазнда The Ring, IBF, WBA ва WBO чемпионлик унвонларига эга бўлган россиялик Дмитрий Бивол билан жанг қилиш учун қайтмоқчи.

Шунингдек, америкалик ўша оқшом залда бўлган Сауль "Канело" Альварес билан рингни бўлишга тайёрлигини билдирди.

"Мен шунчаки мухлисларга улар кўришни хоҳлаган нарсани бермоқчиман. Канелони залда кўрдим. Мухлислардан сўрашга ижозат беринг: Канелонинг Дэвид Бенавидесга қарши жангини кўришни хоҳлайсизми? Биз бу жангни амалга ошмай қолдира олмаймиз. Мен Канелони ҳурмат қиламан, у буюк чемпион, лекин мен ҳам буюкман. Келинг, буни амалга оширамиз! Мен ҳали ҳам ярим оғир вазнда чемпионман. Шундай экан, агар улар бу камар учун келишни истасалар, келинг, буни ярим оғир вазн тоифасида ўтказайлик!", - деди Бенавидес жангдан кейинги интервьюсида.