Биологик фаол озуқалар билан соғлом турмуш тарзи тарғиботини кучайтириш мумкин

Марказ иш фаолиятини янада такомиллаштириш эса спортдаги ютуқларимизни кафолатловчи муҳим омиллардан бўлади. МОҚ ва РСТИАМ раҳбарияти иштирокида ўтган йиғилиш ана шу мавзуга бағишланди. Унда МОҚ раиси Рустам Шоабдураҳмонов ва унинг биринчи ўринбосари Равшан Ирматов, Абдушукур Садиков бошчилигидаги РСТИАМ вакиллари ва МОҚ мутасаддилари иштирок этишди.

Суҳбатда Рустам Шоабдураҳмонов спортчилар учун яратиладиган шароитларнинг муҳимлиги ҳақида гапириб ўтди.

“Баъзи кунларда қон таҳлилларини топшириш давомида узундан узун навбатлар пайдо бўлмоқда. Бу эса ноқулайликлар келтириб чиқармоқда. Шу боис бундай ҳолатларда захира хоналарини кўриб чиқишни таклиф қиламиз. Шунингдек, атлетларимизга бериладиган қўшимча биологик фаол озуқалар таркибини доим назорат қилиш керак. Ушбу воситаларни харид қилишда спортга яқин соҳалар билан ҳамкорлик қилиш масаласини ҳам кўриб чиқайлик. Улардан юртимиз аҳолиси орасида соғлом турмуш тарзини янада кенг тарғиб қилиш мақсадида фойдаланиш мумкин. Туризм ва спорт вазирлиги билан чуқур ҳамкорликни давом эттирамиз. Ҳукуматимиз бундай ғояларимизни қўллаб-қувватлашига ишонамиз”, – деди МОҚ раҳбари.

Йиғилиш давомида Токио-2020 Олимпия ўйинларида делегациямиз учун ишлатиладиган дори воситаларининг таркиби, уларнинг миқдори кўриб чиқилди. МОҚ раҳбарияти томонидан соҳа мутахассисларига Олимпиада мобайнида делегация вакилларининг саломатлигини назорат қилиш бўйича ўз режаларини ишлаб чиқиш, марказ фаолиятини янада такомиллаштириш бўйича топшириқлар берилди.