Бокс. Осиё чемпионатида Қозоғистон ва Ўзбекистон боксчилари ўртасидаги принципиал қарама-қаршиликлар

Қозоғистон терма жамоаси деярли энг кучли таркибини Осиё чемпионатига олиб бормоқда. Жамоанинг чемпонатидаги энг асосий рақиби Ўзбекистон терма жамоаси ҳисобланади. Ўтган Осиё чемпионатида Ўзбекистон ўз уйида барчани  ҳайрон қолдириб, тўққизта олтин медални қўлга киритди. Лекин, Ўзбекистон терма жамоасининг таркиби деярли тўлиқ янгиланди. Қозоғистонликлар ҳам Рио-2016дан кейин таркибда катта ўзгариш қилдилар. 

Ўзбекистон  таркиби:

- 49 кг: Нодиржон Мирзаҳмедов           

- 52 кг: Ҳасанбой Дўсматов                 

- 56 кг: Миразизбек Мирзаҳалилов       

- 60 кг: Шукуржон Раҳимов                

- 64 кг: Шунқор Абдурасулов           

- 69 кг: БобоУсмон Ботуров             

- 75 кг: Исроил Мадримов                     

- 81 кг: Дилшодбек Рўзматов                

- 91 кг: Санжар Турсунов                      

+ 91 кг: Баҳодир Жалолов

Ўтган чемпионатда иштирок этганлардан бор-йўғи Дўсматов, Мадримов ва Жалолов қолди. Эътиборлиси, улардан икки нафари аллақачон профессионал боксда иштирокларини бошлаб юборишган. 24 ёшли Жалолов профида 6 та жанг ўтказиб, рақибларининг барчасини нокаут қилган бўлса, Мадримов иккита жанг ўтказган. Терма жамоанинг асосий юлдузи - Олимпиада чемпиони Ҳасанбой Дўсматов ҳисобланади. 

Қозоғистон таркиби:

-49 кг: Темиртас Жусупов

-52 кг: Анвар Музаппаров

-56 кг: Қайрат Ералиев

-60 кг: Закир Сафиуллин

-64 кг: Санатали Тольтаев

-69 кг: Асланбек Шимбергенов 

-75 кг: Турсинбай Кулахмет

-81 кг: Бек Нурмаганбет

-91 кг: Василий Левит 

+91 кг: Камшибек Кўнкабаев

Василий Левит - Санжар Турсунов

Тошкентда бўлиб ўтган Осиё чемпионатида Олимпиада совриндори Левит рақибини мағлуб этиб, Ўзбекистоннинг барча олтин медални олишига йўл қўймаганди. Левит икки йил муқаддам ўзбекистонлик бўлмаган ягона Осиё чемпиони бўлган. Бу Осиё чемпионатида Санжар рақибидан реванш олишга эришадими ёки Левит тўртинчи олтин медалини қўлга киритадими? Буни эса Осиё чемпионатида кузатамиз.

Камшибек Кўнкабаев - Баҳодир Жалолов

Жаҳон чемпионати кумуш медаль соҳиби Камшибек Жалоловга икки йил муқаддам финалда имкониятни бой берганди. Камшибекнинг асосий мақсади Олимпиадага тайёргарлик бўлса, Баҳодирнинг Олимпия ўйинларига бориши ҳали аниқ эмас. Тошкентдаги финалда мағлуб бўлгандан сўнг Камшибек Баҳодирнинг тактикасини яхши ўрганганлигини, лекин унга қарши кураша олмаганини тан олганди. Икки йил аввалги омадсизликни қозоғистонлик спортчи Бангкокда муваффақиятга айлантира оладими? Агар бу икки боксчи яна рингда тўқнаш келишса, сўзсиз бу турнирнинг безаги бўлади.

Асланбек Шимбергенов - БобоУсмон Ботуров

Олимпиададан сўнг Қозоғистон юлдузи Данияр Елеусинов профессионал боксга ўтиб кетди. Даниярнинг рақиби Шаҳрам Ғиёсов ҳам ҳозирда фаолиятини профида давом эттирмоқда. Қозоғистоннинг бу вазндаги яна бир кучли боксчиси Аблайхан Жусупов ҳам жароҳат туфайли Таиландга бормади. Шу боисдан Қозоғистон шарафини Асланбек Шимбергенов ҳимоя қилади. Унинг асосий рақиби Ботуров охирги олтита Ўзбекистон чемпионатида узлуксиз медаль олмоқда, улардан иккитаси олтин ҳисобланади. Шимбергенов ҳам анча тажрибали боксчи. Қозоғистон чемпиони ва икки марта Осиёнинг энг яхши боксчиси (WSB  талқинида). Бу икки боксчи Осиё ўйинлари финалда жанг қилишган ва ўшанда Ботуров олтин олганди. Бангкокда реванш бўладими ёки йўқ?

Турсинбай Кулахмет - Исроил Мадримов

Яна бир қизиқарли жанг бўлиши мумкин. Турсинбай анча кучли ва тажрибали боксчи. Мадримовга эса ортиқча таъриф бериш шарт эмас. Профессионал боксдаги иккинчи ғалабасидан сўнг уни мухлислар «Монстр» деб аташни бошлашди. Икки йил муқаддам Мадримов бошқа бир қозоқ боксчиси Абилхан Аманқулуни мағлуб этганди. Лекин, Кулахметнинг ўз режалари бўлса керак рақибга нисбатан. Агар бу дуэллар орасида энг қизиғи Кункабаев – Жалолов жанги бўлса, иккинчиси энг қизиқ жанг сўзсиз Кулахмет – Мадримов қарама-қаршилиги бўлади.

Эслатиб ўтамиз, бокс бўйича Осиё чемпионати 19-26 апрель кунлари ўнта вазн тоифасида Таиланд пойтахти Бангкок шаҳрида бўлади.

vesti.kz сайтидан Ниғмонхўжа Нозимов таржимаси