Бокс. Умумжамоа ҳисобида иккинчи бўлдик, Қозоғистон терма жамоаси учинчи

Ҳал қилувчи финал жангларида 4 нафар ўзбекистонлик чарм қўлқоп устаси рингга кўтарилган бўлса, улардан биргина Шаҳрам Ғиёсов кубалик рақиби Рониэль Иглесиасни мағлубиятга учратиб, жаҳон чемпионига айланди.

Ҳакамлар Олимпиада чемпиони Ҳасанбой Дўсматовга нохолислик қилиб, ғалабани кубалик боксчига тақдим этишди. Жасурбек Латипов ва жаҳон чемпионати кашфиётига айланган Иқболжон Холдоров кумуш медал билан тақдирланишди.

Финалга етиб келиш бўйича биз фақат Кубага ютқаздик. Финалда кубалик боксчилардан 7 нафари рингга чиқди. Қозоғистонда бу сон 3 нафарни ташкил қилди.

Якунда умумжамоа ҳисобида Куба терма жамоаси биринчи ўринни эгаллади. Озодлик ороли вакиллари 5та олтин медални қўлга киритишди. Хоанис Аргилагос (49 кг), Йосбани Веития (52 кг), Энди Крус Гомес (64 кг), Хулио Сесар ла Крус (81 кг) ва Эрисланди Савон (91 кг) жаҳон чемпионига айланишди. Ласаро Альварес (60 кг) ва Рониэль Иглесиас (69 кг) кумуш медалга сазовор бўлди.

Қувонарлиси, Ўзбекистон терма жамоаси умумжамоа ҳисобида иккинчи ўринни банд этди. Чарм қўлқоп усталаримиз жаҳон чемпионатида тўлиқ (10 боксчи) таркиб билан иштирок этишди ва якунда 6та медални қўлга киритишди. Шохсупанинг энг юқори поғонасидан Шаҳрам Ғиёсов (69 кг) жой олган бўлса, Ҳасанбой Дўсматов (49 кг), Жасурбек Латипов (52 кг) ва Иқболжон Холдоров (64 кг) кумуш медалга эга чиқди. Бектемир Мелиқўзиев (81 кг) ва Санжар Турсунов (91 кг) Тошкентга бронза медали билан қайтади.

Умумжамоа ҳисобида Қозоғистон терма жамоаси кучли учликка якун ясаб берди. Қайрат Ералиев (56 кг) жаҳон чемпиони бўлди. Абилхан Аманкул (75 кг) ва Камшибек Кункабаев (+91 кг) кўксини кумуш медал безади. Жомарт Ержан (49 кг), Аблайхан Жусупов (69 кг) ҳамда Василий Левит (91 кг) жаҳон чемпионатининг бронза медалига лойиқ кўрилишди.