BOOMMM! Баҳодир Жалолов IBF камари учун жанг қилиши мумкин!

Александр Усик WBC, WBA ва IBF чемпионлик камарларидан воз кечганидан сўнг, ушбу йўналишларда янги чемпионларни аниқлаш жараёни бошланди. Вакант, яъни бўш қолган IBF чемпионлик камари атрофида ҳам турли тахминлар пайдо бўлмоқда.

Ҳозирги вазиятда кубалик Фрэнк Санчес IBF рейтингида биринчи ўринни эгаллаб турибди ва чемпионлик учун асосий даъвогарлардан бири ҳисобланади. Хориж матбуотидаги хабарларга таянадиган бўлсак, ташкилот қоидаларига асосан, Санчес бўш қолган камар учун жанг қилиш имкониятига эга.

Унга ўзбекистонлик икки карра Олимпия ўйинлари чемпиони Баҳодир Жалоловнинг мазкур чемпионлик жангида рақиблик қилиши ҳақида муҳокамалар кучайди. Профессионал фаолиятида ҳозиргача 17 та жанг ўтказиб, уларнинг барчасида ғалаба қозонган Жалолов сўнгги баҳсида хорватиялик Агрон Смакичини техник нокаут эвазига мағлуб этганди.

Бироқ айни пайтда Баҳодир Жалолов ва Фрэнк Санчес ўртасида IBF камари учун жанг ўтказилиши бўйича расмий қарор қабул қилинмаган. Айрим манбаларга кўра, IBF биринчи рақамли даъвогар Санчесга Мозес Итаума – Филип Хргович жуфтлиги ғолиби билан чемпионлик жангини ташкил этиши мумкин. 

Аммо тахмин қилишларича, Фрэнк титул учун баҳсда IBF рейтингида олтинчи ўринни эгаллаб турган ҳамюртимиз билан баҳс олиб бориши эҳтимоли юқори.

Июнь ойи ҳолатига кўра IBF рейтинги:

1. Фрэнк Санчес (Куба)

2. Вакант

3. Мозес Итаума (Буюк Британия)

4. Филип Хргович (Хорватия)

5. Энтони Жошуа (Буюк Британия)

6. Баҳодир Жалолов (Ўзбекистон)

7. Тайсон Фьюри (Буюк Британия)

8. Фабио Уордли (Буюк Британия)

9. Деонтей Уайлдер (АҚШ)

10. Ричард Риакпорье (Буюк Британия).

Маълумот учун, Хргович ва Итаума 29 август куни ўзаро баҳс олиб боришади.