"Бош вазир кубоги" яна "Олий суд" жамоасига насиб этди ФОТОРЕПОРТАЖ

Дастлаб мусобақанинг учинчи ўрин учун баҳси ташкил этилди. Унда «Агро Марказ» жамоаси Ахборот технологиялари ва коммуникацияларни ривожлантириш вазирлиги футболчиларини 3:0 ҳисобида мағлуб этиб, мусобақанинг бронза медалларини қўлга киритишди. Ниҳоят, ҳал қилувчи финал ўйини.

Муҳташам «Бунёдкор» стадионида икки жамоа саф тортди – «Бош вазир кубоги»нинг икки карра ғолиби Ўзбекистон Республикаси Олий суди ҳамда Молия вазирлиги жамоалари.

Ҳаваскор жамоаларга нисбатан профессионал клубларга мос тарзда кечган ўйинда Олий суднинг тажрибали футболчилари рақибларини йирик – 5:0 ҳисобида мағлуб этиб, учинчи бор турнирнинг бош соврини – «Бош вазир Кубоги»ни қўлга киритишди.

Мусобақанинг ёпилиш ҳамда ғолиб ва совриндорларни тақдирлаш маросими ҳам тантанали равишда ташкил этилди.

Ўзбекистон туризм ва спорт вазири ўринбосари Авазбек Каримов, Миллий Олимпия қўмитаси раисининг биринчи ўринбосари Равшан Эрматов, Ўзбекистон Республикаси Вазирлар маҳкамаси масъул ходими Рашид Толипов, Олий суд раиси Козимжон Каримов, Молия вазирлиги вакили Улуғбек Абдуқаҳҳоров аввалига бир қатор жамоалар вакилларини «Ҳалол ўйин ва фаол иштироки учун» номинацияларида рағбатлантирувчи совғалар билан мукофотладилар.

Сўнг бронза, кумуш ва олтин медалларни ўз эгаларига топширишди, тадбирнинг кульминацион нуқтаси эса Олий суд жамоасига «Бош вазир кубоги»нинг тақдим этилиши бўлди.

Суратлар муаллифи - Алимурод МАМАДАМИНОВ, ўз мухбиримиз