Бу қизиқ! Ўзбекистон қишки Осиё ўйинларидаги иштирокини айнан Харбинда бошлаган, АҚШ чемпионининг онаси эса мамлакатимиз учун илк медални қўлга киритган

Шундан кейин ҳар тўрт йилда ўтиши керак бўлган комплекс мусобақалар кўпинча турли сабаблар туфайли бир ёки икки йилга, баъзида ундан ҳам кўп вақтга чўзилади.

Ўзбекистон Миллий Олимпия қўмитасининг қишки Осиё ўйинларидаги илк иштироки 1996 йилга тўғри келади. Ўша йилги ўйинлар Хитойнинг Харбин шаҳрида ташкил этилганди. ХХР раиси Жианг Земин очиб берган мусобақада 17 мамлакатдан ташриф буюрган 453 нафар спортчи 8 та спорт турининг 43 та дастурида медаллар учун кураш олиб борган.

Аввал маълум қилганимиздек, очиқ манбаларда Ўзбекистоннинг Харбин-96 III қишки Осиё ўйинларида неча нафар спортчи билан қатнашгани ҳақида маълумотлар мавжуд эмас. 

Бироқ икки спортчимизнинг медаль қўлга киритгани бўйича инфолар етарли. Ҳозирда фигурали учиш оламидаги энг машҳур спортчилардан бири — АҚШ терма жамоаси аъзоси Илья Малининнинг онаси Татьяна Малинина Харбин-96 қишки Осиё ўйинларининг фигурали учиш баҳсларида Ўзбекистон учун илк медални тақдим этади. Бу кумуш эди. Кейинроқ фристайлчи Сергей Бренер бронза медалига эга чиқади.

Шундай қилиб, Ўзбекистон делегацияси ўзи учун илк қишки Осиё ўйинларида иккита медаль қўлга киритиб, умумжамоа ҳисобида бешинчи ўринни эгаллайди.

Орадан қарийб 28 йил ўтиб, мамлакатимиз спортчилари айнан Харбинда IX қишки Осиё ўйинлари ғолиблиги учун баҳс олиб боришга шайланмоқда.