Буэнос-Айрес йўлида: Сузувчиларимиз рейтинг мусобақасида совриндор бўлишди

III ўсмирлар Олимпия ўйинларига йўлланма қўлга киритиш учун рейтинг баллари ўйналадиган ушбу турнирда ўзбекистонлик сузувчилар ҳам иштирок этишмоқда. Мусобақада Латвия, Литва, Эстония, Белорусь, Россия, Украина, Молдова, Германия каби мамлакат спортчилари ҳам стартга чиқишмоқда.

Қувонарлиси, 50 метрга эркин усулда сузиш баҳсларида Хуршиджон Турсунов биринчи, Муҳаммаджон Абдижалилов учинчи ўринни эгаллади. 100 метрга брасс усулида сузиш йўналишида Владислав Мустафин биринчи ўринни банд этган бўлса, аёллар ўртасида Бибигул Минлибаева иккинчи бўлиб финишга етиб келди.

Ушбу муваффақият туфайли сузувчиларимиз Буэнос-Айрес лицензияси учун муҳим бўлган рейтинг очколарини ишлаб олдилар. Бундан ташқари, мазкур мусобақа спортчиларимиз учун Индонезияда ўтказиладиган Осиё ўйинларига тайёргарликнинг муҳим босқичларидан бири ҳисобланади.