25 май 08:53
Янгиликлар

Теннис

Бугун Жўрабек Украинада финал чиптаси учун кортга чиқади

Украинанинг Ривне шаҳри мезбонлик қилаётган теннис бўйича “Фьючерс” туркумига кирувчи турнир ўзининг ҳал қилувчи палласига кирди.

Соврин жамғармаси 15 000 АҚШ долларини ташкил қилувчи мусобақада истеъдодли теннисчимиз Жўрабек Каримов ҳам муваффақиятли иштирок этяпти. Бугун ҳамюртимиз финал чиптаси учун кортга чиқади.

Жўрабекнинг ярим финалдаги рақиби Жордан Корреа бўлади. Бразилиялик бу теннисчи турнирнинг тўртинчи ракеткаси ҳисобланади, лекин рейтингда Каримовдан анча пастда жойлашган. 19 яшар теннисчимиз ATP рейтингида 504-ўринда бормоқда. 20 ёшли Корреа эса 607-поғонадан жой олган.