Бугун Наманганда “Фьючерс” турнири бошланади, Сабина биринчи ракетка!

Бугун соврин жамғармаси 25 000 АҚШ долларини ташкил қилувчи ушбу мусобақада саралаш баҳслари якунланиб, асосий тўрга йўлланма олган барча теннисчиларнинг номи маълум бўлади. 

Ҳамюртларимиздан асосий тўрда тўғридан-тўғри қатнашиш ҳуқуқини Сабина Шарипова, Нигина Абдураимова, Арина Фолц, Валентина Шлейн ҳамда Сетора Нормуродовалар қўлга киритишди. Сабина, Нигина ва Арина ўз рейтинг ўринлари билан бунга эришишган бўлса, Валентина ва Сеторага ташкилотчилар имтиёзли йўлланма тақдим этишди. 

Эслатиб ўтамиз, шанба куни Андижонда якунланган худди шундай турнирда ҳамюртимиз Сабина Шарипова бош мукофот соҳибасига айланганди. Ҳал қилувчи финал учрашувида турнирнинг биринчи ракеткаси бўлган Шарипова словениялик Кайя Юванни 6/4, 6/2 хисобида мағлуб этганди.

Ушбу муваффақиятли иштирок Сабина Шариповага 50 рейтинг очкосини тақдим этди. Ватандошимиз келаси душанба куни эълон қилинадиган WTA рейтингида бир неча поғонага кўтарилиб олади.