Бугун Нодирбек ва Жавоҳир юлдузлар иштирокидаги "Freestyle Chess Grand Slam"даги юришини бошлайди

Дунёнинг кўзга кўринган гроссмейстерлари қатнашадиган мусобақада икки шахматчимиз - Нодирбек Абдусатторов ва Жавоҳир Синдаров ҳам ўз маҳоратини намойиш қилади. Синдаров мусобақада қатнашишдан бош тортган ҳиндистонлик афсона Вишванатан Ананднинг ўрнини эгаллаган. Жавоҳир саралаш турнири финалига қадар етиб бориб, Владимир Федосеевга 2:3 ҳисобида ютқазганди. 

17 февралга қадар давом этадиган турнир айлана тизимда ўтказилади ва унда бир шахматчи қолган ҳамма иштирокчилар билан рапид форматида ўзаро баҳс олиб боради. Кучли саккизталикдан жой олган шахматчилар плей-офф босқичига йўл олади. 

Бу босқичда ҳар бир матч икки классик партиядан иборат бўлади. Агар икки учрашув натижасига кўра ҳисоб тенг бўлиб қолса, ғолиб тай-брекда аниқланади. Вақт назорати 90 дақиқа бўлиб, кейин ҳар бир юришга 30 сониядан қўшиб борилади. 

Турнир иштирокчилари: Магнус Карлсен (Норвегия, 2833), Фабиано Каруана (АҚШ, 2803), Хикару Накамура (АҚШ, 2802), Доммараджу Гукеш (Ҳиндистон, 2777), Нодирбек Абдусатторов (Ўзбекистон, 2766), Алиреза Фирузджа (Франция, 2760), Левон Аронян (АҚШ, 2745), Винсент Каймер ( Германия,2731), Владимир Федосеев (Словения, 2724), Жавоҳир Синдаров (Ўзбекистон, 2700).