Бугун Вьетнамда Ўзбекистон - Афғонистон учрашуви бўлиб ўтади

Ўз тарихида бешинчи маротаба ўтказилаётган ушбу мусобақада пляж, яъни соҳил футболи бўйича Ўзбекистон терма жамоаси ҳам иштирок этяпти. Аҳад Юсупов бош мураббийлигидаги соҳил футболи вакилларимиз “С” гуруҳи ғолиби сифатида чорак финалга йўл олганди.

Бугун терма жамоамиз чорак финалда Афғонистон билан муносабатига ойдинлик киритиб олади. Афғонистонлик соҳил футболчилар гуруҳнинг сўнгги ўйинида Хитой терма жамоасидан устун келишди ва ўз квартетларида иккинчи ўринни банд этишди. 

Таркибга эътибор қаратадиган бўлсак, футзалчилардан ташқари собиқ машҳур футболчи, Тожиевлар сулоласининг тўнғич вакили Зайниддин Тожиев ҳам бор.

Энг катта камчилик бу – сўнгги йилларда пляж футболи бўйича Ўзбекистон чемпионатининг ўтказилмаётганидир. Клублар бўлмаганидан кейин чемпионат қаердан бўлсин? Табиийки, футболчилар ҳам йўқ. Шундай ҳолатда Аҳад Юсупов “болтадан шўрва” тайёрлаганига қойил қолиш керак.

Осиё ўйинларига бир ҳафта қолганида йиғилган таркиб мусобақага йўл олди. Ҳозирча, натижа ёмон эмас. Ярим финалга чиқиш учун имкониятимиз юқори. Бугун Афғонистон терма жамоасига қарши кечадиган учрашувда футболчиларимизга омад тилаб, улардан ғалаба кутиб қоламиз.