Бутунжаҳон шахмат Олимпиадаси: Исроил терма жамоаларига 6-турда техник мағлубият қайд этилди

Маълум бўлишича, 21 сентябрь куни Исроил эркаклар терма жамоаси Нидерландияга, аёллар жамоаси эса Болгарияга қарши баҳс олиб бориши керак эди. Бироқ мазкур учрашувлар яҳудийлик динидаги муҳим сана — Ём Киппур кунига тўғри келган.

Исроил шахмат федерацияси маълумотига кўра, ташкилот бу масала юзасидан январь ойидаёқ FIDE’га мурожаат қилган. Федерация 20 сентябрдаги 5-тур баҳсларини режадан олдинроқ бошлаш, 21 сентябрдаги 6-тур учрашувларини эса соат 19:30 дан кейин ўтказишни сўраган. Исроил томони FIDE ушбу таклиф бўйича ёзма равишда розилик берганини билдирган.

5-турда Сингапур ва Колумбия терма жамоалари Исроилнинг илтимосини қабул қилиб, учрашувларни белгиланган вақтдан 1 соат 15 дақиқа олдин бошлаган.

Бироқ 6-турда Нидерландия ва Болгария жамоалари баҳсларни бошқа вақтга кўчиришга рози бўлмаган. Натижада Исроилнинг эркаклар ва аёллар терма жамоаларига ушбу турда техник мағлубият қайд этилган.