"Буюк Ипак йўли" турнирига қуръа ташланди. Жалолов Кункабаев билан иккинчи даврада тўқнаш келиши мумкин

Бироз аввал анъанавий тарзда ўтказиб келинаётган Буюк Ипак йўли мусобақасига қуръа ташланди. Кўпчиликнинг эътибори +92 кг вазн тоифасидаги баҳсларга қаратилса ажаб эмас. Боиси, унда Баҳодир Жалолов ва Камшибек Кункабаев иштирок этади.

Қуръа натижасига кўра, Париж-2024 Олимпиадаси лицензиясини қўлга киритиб улгурган бу қардош боксчилар иккинчи даврада ўзаро тўқнаш келиб қолишлари мумкин. Бунинг учун Жалолов биринчи босқичда эронлик Рузбеҳ Сафарини, Кункабаев эса россиялик Рамазан Карнукаевни мағлуб этиши керак бўлади. 

Ушбу вазн тоифасида яна бир чарм қўлқоп устамиз ҳам медаллар учун баҳсларга киришади. Жаҳонгир Зокиров биринчи даврадан озод этилган. У иккинчи босқичда озарбайжонлик боксчи Йоханес Нуриев ва Магаммад Абдуллаев жанги ғолибига қарши рингга кўтарилади.