Царукян Волкановскининг таклифига рад жавобини берди

Австралиялик чемпион Арманга россиялик Ислам Махачевга қарши жангга тайёргарликда спарринг-шерик бўлишни таклиф қилганди.

"У мени ўзининг тайёргарлик лагерига қўшмоқчи бўлганди. Мен бу таклифга рад жавобини бердим. Аввалига Саят, кейин дўстим Эдвин, шундан сўнг Америкадан яна бир йигит менга қўнғироқ қилиб, Волкановскини Исламга қарши жанг учун тайёрлашда ёрдам беришимни сўради. Унинг лагерида бўлишим учун ҳеч қандай мантиқ кўрмаяпман. Агар пул таклиф қилинса ҳам, ҳозирги ҳолатда рози бўлмайман. Мабодо, шу жангга захира варианти сифатида киритилсам, Австралияга жон деб борардим. Менинг режамда оилавий хордиқ бор. Уйда 8-9 ой бўлмадим", - дея "Матч ТВ" телеканалига  интервью берган Царукян.

Шунингдек, Арман Царукян Исламга қарши жангда Волкановскининг имкониятларини чамалаган. 

"Алекс бир неча бор чемпионлик камарини ҳимоя қилган. "Стойка"да зўр жанг ўтказади. Унга беэътибор бўлиш яхши эмас. Негадир кўпчилик унга паст баҳо беряпти. Шундай бўлса-да, мен барибир Исламнинг имкониятларини юқорироқ баҳолайман - 60 га 40. Агар Алекс қафас ёнида туриб қолмаса, марказда тик турган ҳолатда жанг олиб борса, клинчга кириб бормаса, у ҳолда Волкановски қўл ва оёқ зарбалари билан Исламни мағлуб этади", - деди Царукян. 

Эслатиб ўтамиз, Махачев - Волкановски жанги 12 февраль куни Австралиянинг Перт шаҳрида ташкил этиладиган UFC 284 турнири доирасида ўтказилади.