Чим устида хоккей федерацияси энг яхшиларни тақдирлади

Унда Миллий олимпия қўмитаси вакиллари, Ўзбекистон чим устида хоккей федерацияси мутасаддилари, федерациянинг вилоят бўлими вакиллари, спортчилар, ҳакамлар, мураббийлар ҳамда оммавий ахборот воситалари ходимлари иштирок этишди.

Конференция давомида федерация раиси Баҳодир Аҳмедов 2018 йилда ташкилот томонидан амалга оширилган ишлар ҳақида маълумот берди. Шунингдек, 2019 йил учун режалар ҳақида маълум қилди. Унга кўра, яқин вақтларда пойтахтимизда терма жамоа учун янги база иш бошлайди. Сурхондарё ва Сирдарё вилоятларида ҳам чим устида хоккей билан шуғулланиш учун спорт базалари бунёд этилади. Шу ой охирида Бухорода ана шундай спорт базасининг очилиши кутилмоқда.

«Бугунги кундаги энг асосий мақсадимиз Токио 2020 Олимпиадасига йўлланма олишдир. Умид қиламанки, биз мазкур вазифани уддалай оламиз. Миллий олимпия қўмитаси бугунги кунда спортчилар учун етарли шарт-шароитлар яратиб бермоқда, ўқув-машғулот йиғинлари ташкил этилмоқда. Бунинг учун МОҚқа миннатдорчилик билдираман», – деди Баҳодир Аҳмедов.

Шунингдек, Миллий олимпия қўмитаси президенти маслаҳатчиси Назиржон Худойқулов спортчиларимизни Токио 2020 Олимпиадасига тайёрлаш бўйича ишлаб чиқилган стратегия ҳақида батафсил гапириб берди.

Сўнгра, 2018 йилда ўзини кўрсата олган спортчилар, мураббийлар, ҳакамлар ва вилоят бўлимлари ходимларини тақдирлаш маросими ташкил этилди.

Сизга яхши маълумки, Ўзбекистон ҳали Олимпия ўйинларида жамоавий спорт турлари бўйича баҳсларда иштирок этмаган. Умид қиламизки, чим устида хоккей бўйича Ўзбекистон терма жамоаси аъзолари ушбу ноҳуш анъанани бузиб, бу борада ўзбек спорти тарихида биринчи бўладилар.