Чим устида хоккей. Покистондаги мусобақада муваффақиятли қатнашган спортчиларимиз юртимизга қайтиб келишди

Турнир давомида Афғонистон, Непал ва Қозоғистон терма жамоаларини мағлубиятга учратган йигитларимиз гуруҳда биринчи ўринни қўлга киритишди.

Бугун тунда ана шу мусобақада муваффақиятли иштирок этган хоккейчиларимиз юртимизга қайтиб келишди. Уларни Ислом Каримов номидаги Тошкент халқаро аэропортида Миллий олимпия қўмитаси президенти Умид Аҳмаджонов, МОҚ ва Ўзбекистон чим устида хоккей федерацияси мутасаддилари, спортчиларнинг яқинлари ва оммавий ахборот воситалари ходимлари кутиб олишди.

МОҚ раҳбари хоккейчиларимизни қутлар экан, терма жамоанинг Токио Олимпиадасига йўл олиши учун барча шароитлар яратилишини айтиб ўтди.

"Сизлар қайд этган натижадан барчамиз хурсанд бўлдик. Чунки юртбошимизнинг топшириқларига кўра нафақат яккакураш, балки жамоавий спорт турларидан ҳам Олимпия ўйинлари лицензияларини қўлга киритишга, бундай спорт турларини юртимизда ривожлантиришга ҳаракат қиляпмиз. Бу йўлда катта ҳажмдаги иш олиб борилмоқда. Шундай экан, Олимпиадага лицензия олиш учун сизда жуда яхши имконият бор. Бундан буён Миллий олимпия қўмитаси сизларни ҳар томонлама қўллаб-қувватлайди. Терма жамоа аъзоларига Олимпия стипендиялари жорий этилади. МОҚнинг қўллаб-қувватловига, кўмагига ишонишингиз мумкин", - деди Умид Аҳмаджонов.

Эслатиб ўтамиз, Токио 2020 Олимпиадасига йўлланма берувчи мусобақа келаси йил Ҳиндистонда ўтказилади.

Маълумот учун, Ўзбекистон хеч қачон жамоавий спорт турлари бўйича Олимпия ўйинларида иштирок этмаган. Умид қиламизки, чим устида хоккейчиларимиз бу борада биринчи бўлишади ва ўзбек спорти тарихига киришади. Миллий олимпия қўмитаси бу йўлда терма жамоамизга омад тилайди.