Чимаев Адесанья ва Усманни мағлуб эта олади

UFC жангчиси яримўрта ва ўрта вазн тоифаларида октагонга чиқиб келмоқда. У ушбу вазн чемпионлари Исраэль Адесанья ва Камару Усман билан жанг қилиш имкониятлари ҳақида гапирди.

"Ўйлашимча, чемпионлик жангига яна иккита жанг қолди. Ҳар икки чемпион билан бир UFC оқшомида жанг қилишга тайёрман. Мен учун ўзим учун аллақачон ММАни кашф қилиб бўлганман. Фёдор Емельяненконинг ўзидан деярли икки баравар гавдаси катта Кевин Ренделманга қарши кечган жанги кунидан эътиборан ММАни яхши кўриб қолганман. Ўшанда мен эркин кураш билан шуғулланардим. Лекин Швеция паспорти йўқлиги учун жаҳон чемпионатида қатнаша олмаганман. Кейин дўстим ўзимни ММАда синаб кўриш таклифини берганди. 

Камару Усман — яхши жангчи, лекин унда мендаги каби нокаутбоп зарбаси йўқ. Унинг кураш усули ҳам меники сингари кучли эмас. Агар залда яхшигина машғулот ўтказсам, курашда мени ҳеч ким мағлуб эта олмайди. 

Адесанья — "стойка"да яхши. Рақибларидан ҳеч ким у билан курашда жанг қилмаган. Йоэль Ромеро Исраэль билан жангда уч ёки тўртта зарба бера олди, холос. Ўйлайманки, уни фақат мен мағлуб эта оламан. Мен уни партерга туширганимда ўрнидан тура оладими? Билмадим. Лекин мен унинг юзини бежаб қўйишим аниқ", — дея UFC Russia каналига интервью берган Хамзат Чимаев.