Дэвис Кубоги. Ўзбекистоннинг I Жаҳон гуруҳи плей-офф босқичидаги рақиби маълум. Баҳс Тошкентда ўтказилади

Терма жамоамиз бу сафар I Жаҳон гуруҳига ўтиш босқичи (плей-офф)да ўйнайди. Қуръа натижасига кўра, терма жамоамизга Польша рақиблик қилади. Ушбу қарама-қаршилик 2024 йилнинг 2-3 февраль кунлари Тошкентдаги "Ҳумо Арена" мажмуасида ўтказилади. Учрашувлар хард қопламали кортда ташкил этилади.

Эслатиб ўтамиз, Ўзбекистон терма жамоаси сентябрь ойида I Жаҳон гуруҳи доирасида Бельгияга қарши меҳмонда ўйнаб, 1:3 ҳисобида мағлуб бўлган эди. Польша термаси эса охирги ўйинини II Жаҳон гуруҳида Барбадосга қарши ўтказиб, 4:0 ҳисобида зафар қучган.

Маълумот ўрнида, Ўзбекистон терма жамоаси айни пайтда Дэвис Кубоги рейтингида 36-ўринни эгаллаб турибди. Польша эса ушбу рейтингда 51-ўринда қайд этилган.

Таъкидлаш жоиз, Ўзбекистон терма жамоаси Тошкентдаги сўнгги ўйинини 2023 йилнинг февралида асосий тўрга саралаш раунди доирасида АҚШга қарши ўтказиб, 0:4 ҳисобида имкониятни бой берган.