Дзюдо бўйича Тошкент Гран-присининг тантанали очилиш маросими бўлиб ўтди ФОТОГАЛЕРЕЯ

Бундан бир неча дақиқа аввал "Ҳумо Арена"да мусобақанинг тантанали очилиш маросими бўлиб ўтди. Унда Ўзбекистон Республикаси Бош вазири ўринбосари Азиз Абдуҳакимов, Халқаро дзюдо федерацияси (IJF) бош спорт директори Владимир Барда сўзга чиқди. 

Владимир Барда Тошкент Гран-присини юқори савияда ўтишини таъминлаётган Ўзбекистон Республикаси ҳукумати, мамлакат дзюдо федерацияси ҳамда ҳомийларга Халқаро дзюдо федерацияси номидан миннатдорчилик билдирди. 

Азиз Абдуҳакимов ўз сўзида еттинчи маротаба пойтахтимиз мезбонлигида ташкил этилаётган ушбу нуфузли турнирнинг илк бор муҳташам, кўп тармоқли "Ҳумо Арена"да ўтказилаётгани, бугунги кунда 33 мингдан зиёд киши бевосита дзюдо билан шуғулланаётганини алоҳида урғулади. 

Шунингдек, Тошкент Гран-присининг тантанали очилиш маросимида Ўзбекистон Республикаси Президентининг Давлат маслаҳатчиси Абдужаббор Абдувоҳидов, Ўзбекисон Жисмоний тарбия ва спорт вазири Дилмурод Набиев, вазирнинг биринчи ўринбосари Ойбек Касимов ва бошқа расмий шахслар иштирок этишди.

Шундан сўнг Ўзбекистон Республикаси давлат мадҳияси ҳамда Халқаро дзюдо федерациясининг мадҳияси янгради. Миллий чолғуларимиз - карнай-сурнай ва доира садолари "Ҳумо Арена"ни ларзага келтирди.

Суратлар муаллифи - Алимурод Мамадаминов