Дзюдо. Осиё Кубогида умумжамоа ҳисобида иккинчи бўлдик+ФОТО

“Газпром” спорт мажмуасида ўтган Очиқ қитъа Кубогида юртимиз ва мезбон спортчилардан ташқари Россия, Жанубий Корея, Қозоғистон, Мўғулистон, Ҳиндистон, Хитой Тайпейи каби 12та давлатдан келган 370 нафар дзюдочи жами 32та медаллар жамланмаси учун кураш олиб борди. 

Ўзбекистон терма жамоаси ҳам Иссиқкўлдаги ушбу мусобақада тўлиқ таркиб билан иштирок этди. Дзюдочиларимиз якунда 4та олтин, 5та кумуш, 6та бронза, жами 15та медал билан умумжамоа ҳисобида иккинчи ўринни эгаллашди. 

Ҳамюртларимиздан ўз вазн тоифаларида Авазбек Исмоилов (73 кг), Сита Аминова (48 кг), Нилуфар Эрганбетова (52 кг) ва Ирисхон Қурбонбоева (63 кг) барча рақибларини мағлубиятга учратиб, шохсупанинг энг юқори поғонасига кўтарилишди. 

Еттита олтин, битта кумуш, 9та бронза медалини қўлга киритган Қозоғистон терма жамоаси дзюдочилари умумажамоа ҳисобида биринчи бўлишди. Биттадан олтин, кумуш ва бронза медалларига сазовор бўлган Мўғулистон терма жамоаси кучли учликка якун ясади.