Дзюдо. Қизларимизда Европа Очиқ Кубогида биттадан кумуш ва бронза+ФОТО

Ушбу мусобақада юртимиз спорт шарафини Искандар Расулов ва Байрамбай Сатуллаев мураббийлигидаги ёш дзюдочиларимиз ҳимоя қилишяпти. Қизларимиздан икки нафари турнирнинг биринчи куни совриндорлар сафидан жой олишди. 

-52 кг вазн тоифасида татамига чиққан вакиламиз Нилуфар Эрмагамбетова финалга қадар мағлубиятсиз етиб бориб, кумуш медал билан тақдирланди. У финалгача туркиялик Эда Карадемир, озарбайжонлик Улвийя Байрамова, швециялик Кайлейх Виннерлендни иппон баҳоси эвазига таслим этди. Олтин медал учун кечган баҳсда эса мўғулистонлик Сосорбарам Лхагвасуренга имкониятни бой берди. 

-44 кг вазндаги ҳамюртимиз Ҳалимажон Қурбонова бронза медалига сазовор бўлди. У беллашувларда қозоғистонлик Айим Жумагалиева, туркиялик Озкан Ханифени мағлуб этиб, ярим финалда яна бир мезбон спортчи Азак Меврега ютқазиб қўйди. Бронза медали учун кечган баҳсда эса косоволик Эрза Муминовиқни иппон баҳоси, яъни соф ғалаба эвазига енгди.