Дзюдо. Россиядаги “Мастерс”да битта медал қўлга киритилди

Ушбу нуфузли йилнинг сўнгги мусобақасида дунёнинг 46 мамлакатидан сара спортчилар иштирок этяпти. Кеча турнирнинг биринчи куни тўрт нафар дзюдочимиз татамига чиқди. Улардан фақат биригина совриндорлар сафидан жой олди.

-60кг вазн тоифасида юртимиз спорт шарафини ҳимоя қилган Шарофиддин Лутфуллаев бронза медали учун кечган баҳсда россиялик Роберт Мшвидобадзени мағлубиятга учратишга муваффақ бўлди.  

-73кг вазндаги ҳамюртимиз Ғиёсжон Бобоев эса бронза медали учун бўлиб ўтган учрашувда швециялик рақибига имкониятни бой бериб, бешинчи ўрин билан кифояланди.

Бугун Яҳё Имомов (-90кг), қизларимиздан Гулноза Матниязова (-70кг) ва Кумуш Йўлдошева (-78кг) “Мастерс” турнирида ўз маҳоратларини намойиш этишади. Ҳозирча терма жамоамиз битта бронза медали билан умумжамоа ҳисобида 10-ўринни эгаллаб турибди.