Дзюдочиларимиз Японияда "Мастерс"га тайёргарлик кўришяпти ФОТОРЕПОРТАЖ

Машғулотларда бешта давлат - Япония, Грузия, Бразилия, Украина ва Ўзбекистон дзюдочилари иштирок этяпти. Қўшма халқаро йиғин барча мамлакат терма жамоаси дзюдочиларига 12-14 декабрь кунлари Хитойнинг Циндао шаҳрида ўтказиладиган "Мастерс" сериясига кирувчи нуфузли турнирга тайёргарлик вазифасини ўтаб беради. 

Терма жамоамиз аъзолари Олимпиада ва жаҳон чемпиони Илиас Илиадис ҳамда Бекзод Тўрабоев бошчилигида машғулот ўтказишяпти. Йиғинда Шарофиддин Лутфуллаев, Диёрбек Ўразбоев, Ҳикматуллоҳ Тўраев, Камолиддин Расулов, Давлат Бобонов, Бекмурод Олтибоев, Алишер Юсупов, Муҳаммадкарим Ҳуррамов сингари дзюдочиларимиз иштирок этишмоқда. 

Эслатиб ўтамиз, бир ҳафта аввал Ўзбекистон терма жамоаси айнан Осака шаҳрида ўтган "Катта Дубулға" туркумига кирувчи турнирда қатнашиб, биттадан кумуш ва бронза медалига эга чиққанди. -90 кг вазн тоифасида юртимиз шарафини ҳимоя қилган Давлат Бобонов мусобақанинг кумуш медали ҳамда 700 рейтинг очкосини қўлга киритган, +100 кн вазндаги дзюдочимиз Алишер Юсупов эса бронза медалига сазовор бўлиш баробарида ўз ҳисобига 500 очкони қўшиб қўйган эди.