Элит ОЧЛ. Буёғи қандай давом этади?

Гуруҳ учрашувлари якунларига кўра, Ғарб ва Шарқ минтақасидан 8 тадан 16 та жамоа кейинги босқичга йўл олганди. 1/8 финал ўйинларидан сўнг 8 та клуб мусобақа билан хайрлашди.

Ғарбда "Ал Васл" (БАА), "Истиқлол" (Эрон), "Ал Райан" (Қатар) ва "Пахтакор" (Ўзбекистон) шу босқичда ўз иштирокини тугатган бўлса, Шарқда "Шанхай Порт" (Хитой), "Шанхай Шеньхуа" (Хитой), "Жоҳор Дарул Таъзим" (Малайзия) ва "Виссел Кобе" (Япония) мусобақани нимчорак финалда якунлади.

Бу ёғига ҳар икки минтақадан кучли 8 та жамоа қолди ва турнир регламентига кўра, 1/4 финалдан бошлаб барча ўйинлар Саудия Арабистонида ўтказилади. Марказлашган тартибдаги ўйинларга Жидда шаҳридаги икки стадион - "Қирол Абдуллоҳ" (сиғими 63 минг) ва "Шаҳзода Абдуллоҳ Ал Файсал" (сиғими 27 минг) мезбонлик қилади.

Элит Осиё чемпионлар Лигасининг навбатдаги формати қуйидагича кўриниш олади. 14 март куни бўлиб ўтадиган қуръа маросимидан сўнг жамоалар Ғарб-Шарқ мисолида тўртта жуфтликка ажратилади. Яъни, аввалги йиллари Шарқ ва Ғарб фақат финалда ўзаро рақиб бўлган бўлса, эндиликда чорак финалдан бошлаб Шарқнинг рақиби Ғарб, Ғарбнинг рақиби Шарқ жамоалари бўлади.

Чорак финал ўйинлари 25-26 апрель куни ўтказилса, ярим финал учрашувлари 29-30 апрелга белгиланган. 4 май куни муҳташам "Қирол Абдуллоҳ" стадионида мусобақанинг ҳал қилувчи финал ўйини бўлиб ўтади. Финал битта ўйиндан иборат бўлади. Шунингдек, 3-ўрин учун баҳс ўтказилмайди.

Ҳал қилувчи босқичда иштирок этадиган клублар:

"Ал Аҳли" (Судия Арабистони)
"Ал Ҳилол" (Саудия Арабистони)
"Ал Насср" (Саудия Арабистони)
"Ал Садд" (Қатар)
"Бурирам Юнайтед" (Таиланд)
"Йокогама Маринос" (Япония)
"Кавасаки Фронтале" (Япония)
"Гвангжу ФК" (Жанубий Корея)

Сизнингча, чемпионликни ким қўлга киритади?