Энди бизда ҳам Олимпиада чемпиони бор, терма жамоамиз 39-ўринда!

Энди бизда ҳам Олимпиада чемпиони бор. -49 кг вазн тоифасидаги боксчимиз Ҳасанбой Дўсматов терма жамоамизга дастлабки олтин медални тақдим этди. Шунингдек, юнон-рум кураши баҳсларида гиламга чиққан -59 кг вазн тоифасидаги полвонимиз Элмурот Тасмурадов бронза медалини қўлга киритди.

Ундан аввал дзюдочиларимиз Диёрбек Ўрозбоев, Ришод Собиров, боксчимиз Рустам Тўлаганов терма жамоамизга бронза медалларини келтиришган эди. Ўзбекистон спорт делегацияси 1та олтин, 4та бронза медали билан умумжамоа ҳисобида 207 иштирокчи давлат орасида 39-ўринга кўтарилиб олди.

Олимпиаданинг тўққизинчи кунги баҳсларидан сўнг АҚШ терма жамоаси бир кам 70та медални қўлга киритиб улгурди. Шулардан 26таси олтин, 21таси кумуш, 22таси бронза медалларидир. Иккинчи ўринга Буюк Британия терма жамоаси кўтарилиб олган. Уларнинг олтин медаллари сони 15тага етди. Яна 16та кумуш ва 7та бронза медали ҳам бор. Хитой терма жамоаси учинчи ўринга пастлади. Чин юрти жамоаси 15та олтин, 13та кумуш, 17та бронза медалини қўлга киритган.

Шу кунгача 47та давлат терма жамоалари камида бир нафар Олимпиада чемпионига эга бўлиб улгурган. Роппа-роса 60та терма жамоа ҳисобида эса камида биттадан кумуш медал бор. Олтмиш саккизта мамлакат терма жамоаси эса камида биттадан бронза медалига эга бўлиб турибди.

МЕДАЛЛАР ЖАМҒАРИШ. ТОП-10

1. АҚШ – 69 (26-21-22)

2. Буюк Британия – 38 (15-16-7)

3. Хитой – 45 (15-13-17)

4. Россия – 30 (9-11-10)

5. Германия – 17 (8-5-4)

6. Франция – 22 (7-8-7)

7. Италия – 21 (7-8-6)

8. Япония – 27 (7-4-16)

9. Австралия – 22 (6-7-9)

10. Жанубий Корея – 14 (6-3-5)...

... 39. ЎЗБЕКИСТОН – 5 (1-0-4)