Энди Маррей ва Новак Жокович беш йилдан сўнг яна ўзаро тўқнаш келишади

Мусобақанинг 1/8 финалига келиб теннис мухлислари орадан беш йил ўтиб Жокович ва Маррей ўртасидаги навбатдаги қарама-қаршиликка гувоҳ бўлишади. Ушбу баҳс турнирнинг энг қизиқарли учрашуви бўлиши кутилмоқда.

Теннисчилар шу вақтга қадар ўзаро 37 марта тўқнаш келишган ва уларнинг 25 тасида Новак ғалаба қозонган. 11 та баҳсда эса Маррейнинг қўли баланд келган. Спортчиларнинг охирги учрашуви 2017 йилда Qatar Open турнири доирасида бўлиб ўтган. Ўшанда Жокович 6/3, 5/7, 6/4 ҳисобида ғалаба қозонганди. 

Энди Маррей Жокович билан бўлажак ўйин ҳақида фикрларини билдириб ўтди: "Назарий жиҳатдан менда ғалаба қозониш учун имконият бўлмаслиги мумкин. Чунки у дунёнинг биринчи ракеткаси ва мен металл сон билан ўйнайман. Мен учун бу баҳс қандай савияда эканлигимни кўриш ва унга қарши яна ўйнаш учун ажойиб имконият.

Ўтган йиллар давомида биз дунёнинг энг йирик турнирларида кўплаб ажойиб учрашувларни ўтказдик. Менимча, биз "Катта Дубулға" турнирларининг барчасида финалда ўйнаганмиз, бу ерда ҳам финалда тўқнаш келганмиз. Мен узоқ вақтдан бери Новак билан учрашиш имконига эга бўлмадим. Ҳатто бу пайдо бўладими буни ҳам билмасдим. Шундай экан, ўйиндан завқ олган ҳолда, унга фантастик кайфият билан киришаман ва бор кучимни ишга соламан",-дея фикр билдирди Маррей. 

Теннисчилар ўртасидаги ўйин бугун Тошкент вақти билан соат 15:00да бошланади.