Эрон терма жамоасига Мисрга қарши ўйиндан 2 кун олдин АҚШга киришга рухсат берилди

АҚШ Жаҳон чемпионатида Эрон терма жамоаси учун чекловларни юмшатиб, уларга Мисрга қарши ўйиндан икки кун олдин мамлакатга киришга рухсат берди.

Жамоалар 27 июнь куни ЖЧ-2026 3-тур доирасида Сиэтлдаги "Люмен Филд" стадионида ўзаро тўқнаш келади.

Аввалроқ Эрон бош мураббийи Амир Ғаленойи жамоасига ўйинлардан олдин АҚШга олдиндан киришга рухсат берилмаганидан норозилигини билдирган эди. Энди Эрон терма жамоаси чоршанба куни Америкага етиб келиши ва ўйиндан дарҳол кейин Мексикадаги базасига қайтиши кутилмоқда.

"Эроннинг Сиэтлдаги учинчи ўйинида иштирок этиши учун жамоага ўйиндан икки кун олдин АҚШга киришга рухсат берилди.

Эрон терма жамоаси ўйин якунланган куниёқ мамлакатни тарк этиши шарт. Умумий хавфсизлик чоралари ва протокол ўзгаришсиз қолмоқда.

Биз футболчилар, ходимлар ва мухлислар учун имкон қадар хавфсиз турнирни таъминлашга интилишда давом этамиз", — деди АҚШ Миллий хавфсизлик вазирлиги вакили.

"Бу бизнинг томонимиздан режалаштирилган эди. Биз дастлабки иккита сафар қандай ўтишини кузатмоқчи эдик ва агар улар муаммосиз ўтса, йўлга кетадиган узоқ вақтни инобатга олган ҳолда қўшимча кун қўшмоқчи эдик", — деди Оқ уй ишчи гуруҳи ва ЖЧ-2026 ташкилий қўмитаси раҳбари Эндрю Жулиани.

Эрон футбол федерацияси чоршанба куни етиб келиш учун чора-тадбирлар кўрилганини тасдиқлади.

ФИФА қоидалари жамоаларга фақат "фавқулодда ҳолатларда" ўйиндан икки кун олдин келишга рухсат беради. Эрон Тихуанадан узоқ масофа босиб ўтиши кераклиги сабабли Сиэтлда акклиматизация учун қўшимча вақт сўраган эди. Пайшанба куни улар Вашингтонда машғулот ўтказиши керак.