Esports World Cup Chess. Бироздан сўнг Нодирбек ва Жавоҳир сўнгги имкониятдан фойдаланади, рақиблар маълум

Esports World Cup Chess турнирининг гуруҳ босқич илк учрашувида мос равишда Ҳикару Накамура ва Магнус Карлсенга имкониятни бой берган Жавоҳир Синдаров ҳамда Нодирбек Абдусатторов бугун "мағлублар" сеткаси орқали плей-оффга чиқишга уриниб кўради. 

D гуруҳидан жой олган ва NAVI жамоаси шарафини ҳимоя қилаётган Абдусатторов ўзи сингари илк учрашувида енгилган америкалик Фабиано Каруанага қарши баҳс олиб боради. Ушбу жуфтлик ғолибини польшалик Ян-Криштофф Дуда кутиб турибди. Икки учрашувда ғалаба қозонган Магнус Карлсен эса айнан Дуда - Каруана/Абдусатторов баҳси ғолиби билан плей-офф чиптаси учун ўйнайди. 

С гуруҳида қатнашаётган Жавоҳир Синдаров эса бугун хитойлик гроссмейстер Ве Йи билан ҳисоб-китоб қилади. Ғалаба қозонган тақдирда яна Ҳикару Накамура билан тўқнаш келади. Жавоҳир кеча айнан Накмурага 0:2 ҳисобида ютқазиб қўйганди. Ҳикару иккинчи учрашувда француз Алиреза Фирузджадан енгилди. Алиреза энди плей-офф йўлланмаси учун Синдаров, Йи ёки Накамурага қарши баҳс олиб боради. 

Бугун гуруҳ ўйинлари якунига етади. Эртага плей-офф, 1 август кунига эса финал учрашуви белгиланган. Саралаш ўйинлари 4 та гуруҳда ташкил этилмоқда.