Файзиев Актобедаги турнирда чорак финалга чиқди

Соврин жамғармаси 25 000 АҚШ долларини ташкил қилувчи мусобақада ҳамюртимиз Санжар Файзиев юртимиз спорт шарафини ҳимоя қиляпти. Турнирда олтинчи рақам остида таснифланган Санжар чорак финал йўлланмасини қўлга киритди.

Истеъдодли теннисчимиз бир неча дақиқа аввал якунига етган иккинчи давра учрашувида польшалик Андрей Капашни мағлуб этди. Бир соату 26 дақиқа давом этган баҳсда Файзиев 6:3, 6:2 ҳисобида зафар қучди.

Маълумот учун, у биринчи даврада ҳиндистонлик Вижай Сундар Прашантдан 6:4, 7:5 ҳисобида устун келган эди. Яна бир теннисчимиз Саидаъло Саидкаримов эса турнирнинг 7-ракеткаси чехиялик Ян Мертига 1:6, 6:7(4) ҳисобида имкониятни бой бериб қўйди.