Фазлиддин Ғоибназаровнинг бўлажак рақиби, собиқ жаҳон чемпиони Ражаб Бутаев ҳамюртимизга қарши жанг олдидан ўз фикрини билдирди

Боксчилар ўртасидаги жанг 6 ноябрь куни Россиянинг Сочи шаҳрида ташкил этиладиган профессионал бокс оқшомида ўтказилади.

"Ҳа, қайтишим кўп вақтни олди, деярли 1 йил рингга чиқмадим. Аввалига соғлигим билан боғлиқ муаммолар бўлди, мен даволанаётган эдим, кейин санкциялар туфайли жанг қила олмадим. Тўғрисини айтсам, қўлқопларимни илиб қўйиш ҳақида ўйлагандим, лекин катталар билан маслаҳатлашиб, яхшилаб ўйлаб, яна чемпион бўлишга қарор қилдим!

Ниҳоят рингга чиқаётганимдан, жанг Россияда бўлишидан ва оилам менинг жангимни жонли кўриши мумкин бўлганидан хурсандман. Ҳа, Фазлиддин жиддий рақиб, Олимпиада чемпиони унвони кўп нарсани англатади, лекин менинг мақсадим икки карра жаҳон чемпиони бўлиш, ва бу йўлда қаршимда ким туриши муҳим эмас".

32 ёшли Фазлиддин Ғоибназаров проф боксда 11 ғалаба (6 нокаут) ва 1 мағлубият қайд этган. Ягона мағлубиятини 2019 йилда Майкл Фоксдан қабул қилиб олган. 2022 йилнинг 2 декбарь куни "Ҳумо Арена"да яна бир ҳамюртимиз Жамшид Каримовни очколар ҳисобига кўра таслим этган эди. Бу унинг ҳозирча сўнгги жанги бўлиб турибди.    

Қизиқ бир маълумот, Фазлиддин Бутаевга қарши жанг ўтказган учинчи ўзбек боксчиси бўлади. Бунга қадар Ражаб 2017 йилда боксчиларимиз Шерзодбек Олимжонов ва Баҳромбек Паёзовни муддатидан аввал мағлубиятга учратган эди.