Федерацияда ҳисобот-сайлов конференцияси ўтказилди

Тадбирда Ўзбекистон Жисмоний тарбия ва спорт вазирининг биринчи ўринбосари Ойбек Касимов, Ўзбекистон Миллий олимпия қўмитаси бош котиби Жасур Матчанов, Ўзбекистон дзюдо федерацияси раҳбарияти, вилоят федерациялари мутасаддилари ва мураббийлар иштирок этишди. 

Конференция кун тартибидан федерация раиси ҳамда ўринбосарлари, қўмимта аъзоларини сайлаш, шунингдек, спортчиларимизнинг жорий йил ҳисобидан ўтказиладиган нуфузли мусобақаларга тайёргарлиги каби масалалар ўрин олган эди. 

Йиғилишнинг асосий қисмида лавозимларга тайинловлар бўлиб ўтди. Ўзбекистон дзюдо федерацияси раиси Азизжон Камилов ўз лавозимига қайта сайланди. Федерация бош котиби вазифасини вақтинча бажариб келаётган Дониёр Илхамов расман ушбу лавозимга тасдиқланди. 

Армен Богдасаров, Бекзод Тўрабоев, Зафар Мамажонов, Шоатхам Исроилов ва Бобур Шодиев федерация раиси ўринбосари этиб тайинланди. 

Номлари келтирилган раис ўринбосарлари, шунингдек, федерация бош котиби Дониёр Илхамов, ҳакамлар қўмитаси раиси Нағмонжон Мирзараҳмонов, миллий терма жамоа бош мураббийи Фарҳод Тўраев, раис ёрдамчиси Улуғбек Бухаров, халқаро тоифадаги ҳакамлар Вячеслав Перетейко ва Рамзиддин Саидов Ўзбекистон дзюдо федерацияси ижроия қўмитаси аъзолигига сайланишди. 

Конференцияда сўзга чиққан Фарҳод Тўраев терма жамоамиз дзюдочиларининг яқиндагина БААда ўтган Осиё чемпионати ҳамда бошқа лицензион мусобақалардаги иштироки, шу йил дзюдо ватани - Япония мезбонлик қиладиган жаҳон чемпионатига тайёргарлиги хусусида маълумот берди. 

Таъкидлаш жоиз, Абу-Даби шаҳрида ўтган Осиё чемпионатида Ўзбекистон терма жамоаси 1 та олтин, 2 та кумуш, 2 та бронза медалини қўлга киритган ҳолда Осиё ва Океаниянинг 40 иштирокчи давлати орасида 6-ўринни банд этган эди.