Фомин ажойиб камбэк эвазига 4-ракеткани мағлуб этди ва 1/2 финалга йўл олди

"Челленжер" туркумига кирувчи мусобақада истеъдодли теннисчимиз Сергей Фомин ҳам муваффақиятли иштирок этяпти. Ҳамюртимиз илк даврада рейтингда ўзидан 460 поғона юқорида бораётган россиялик Алибек Качмазовни 6/1 7/6 ҳисобида мағлуб этганди. 

Кеча Фомин нимчорак финал баҳсида яна бир рейтинги юқори теннисчи, германиялик Себастьян Фанзеловни 6/3, 6/3 ҳисобида таслим этиб, Денис Истоминнинг мағлубияти учун реванш олганди. 

Ҳозиргина якунига етган чорак финал учрашувида эса Фомин ҳақиқий қаҳрамонлик кўрсатди. У турнирнинг 4-ракеткаси, дунё рейтингида 285-поғонадан жой олиб турган япониялик Каичи Учидани 5/7, 6/3, 6/4 ҳисобида доғда қолдирди. 

Сергей учинчи ҳал қилувчи сетда 2/4 ҳисобида ютқаза туриб, ажойиб камбэкни амалга ошира олди. Аввалига рақибининг геймини ютиб олди ва кейин ўз геймида мувозанатни тиклади. Учрашув давомидаги 9 та эйс зарбаси ҳам Фоминнинг муваффақиятига хизмат қилди.   

Таққослаш учун, Сергей Фомин ATP рейтингида 838-поғонадан жой олган. Учрашув 2 соату 12 дақиқа давом этди. Бу теннисчиларнинг ўзаро ўтказган илк тўқнашуви эди. Фоминнинг 1/2 финалдаги рақиби бироздан сўнг маълум бўлади.