Гибралтар ўз тарихида илк маротаба ғалаба қозонди

Ўз майдонида Европанинг энг кучсиз жамоаларидан бири Гибралтарни қабул қилган Арманистон кутилмаганда 0:1 ҳисобида ютқазиб қўйди. Шуни айтиш лозим, Гибралтар терма жамоаси 2016 йилдан буён ФИФА байроғи остида мусобақаларда иштирок этиб келмоқда. Арманистон билан ўйинга қадар Гибралтарнинг статискаси қуйидагича эди: 22 ўйин, 22 мағлубият. Бу жамоа 5та гол уриб, ўз дарвозасидан 107та тўп ўтказиб юборганди.

Шундай қилиб Гибралтар тарихда биринчи бор расмий ўйинда ғалаба қозонди ва бу ғалаба сафарда Арманистонга қарши баҳсда қўлга киритилди. Ўйиндан олдин қизиқ ҳодиса рўй берди. Стадион ходимлари адашиб Гибралтар мадҳияси ўрнига Лихтенштейн мадҳиясини қўйиб юборишди. Кейин мезбонлар бундай қўпол хато учун узр сўрашди.

Учрашувдаги ягона гол 50-дақиқада Гибралтар футболчиси Жозеф Чиполина томонидан киритилди. Маълумот учун, ушбу футболчи профессионал мақомдаги спортчи эмас, у офис менежер бўлиб ишлайди. Бу Чиполинанинг термадаги илк голи бўлди. Гибралтар бунгача иккита ўртоқлик учрашувида ғалабага эришган. Биринчиси 2014 йил Мальта устидан 1:0 ва иккинчиси шу йилнинг мартида Латвия устидан 1:0.

Ўйинда арманлар рақиб дарвозаси томон 36та зарба беришди, гибралтарликлар посбони Кайл Голдвин эса 14 марта сейв амалга оширди. Дарвоқе, Гибралтарда аҳоли сони атиги 34 минг. УЕФАга аъзо давлатлар орасида фақат Сан-Марино Гибралтарга нисбатан кам аҳолига эга.