Гомелдаги турнирнинг иккинчи кунида яна учта медал ФОТОГАЛЕРЕЯ

Ўз тарихида иккинчи бор ташкил этилган "Прайд Кубоги"да 11 давлатдан 2006-2007, 2008-2009 ҳамда 2010-2011 йилларда таваллуд топган жами 1000 нафарга яқин ўсмир дзюдочилар иштирок этди. Юртимиз шарафини Ўлмас Гуллиев мураббийлигида ўзбекистонлик дзюдочилар ҳимоя қилишди. 

Қувонарлиси, ҳамюртларимиздан 6 нафари тақдирлаш маросимида шохсупага кўтарилди. Турнирнинг биринчи куни Ином Баҳодиров барча рақибларини мағлубиятга учратиб, халқаро турнирнинг олтин медалига сазовор бўлганди. Убайдуллоҳ Ботиров ва Иноятулло Телмонов эса бронза медалини қўлга киритган эди. 

Иккинчи кунги баҳсларда ҳамюртларимиз яна 3та медални терма жамоамизга тақдим этишди. Саидакбар Мамиров олтин медал билан шохсупанинг энг юқори поғонасига кўтарилиб, мадҳиямизнинг янграшига сабабчи бўлди. Музаффар Турсунов кумуш, Миржаҳон Сайфидинов эса бронза медалига эга чиқди.