Grand Slam. Дзюдочиларимиздан омадсиз старт

Нуфузи жиҳатидан жаҳон чемпионатига қиёсланадиган ушбу мусобақада Ўзбекистон терма жамоаси полвонлари ҳам иштирок этишяпти. Афсуски, мусобақанинг илк куни дзюдочиларимиз учун омадсиз келди. Бугун татамига чиққан тўрт нафар спортчимизнинг бари илк баҳслардаёқ мағлубият аламини тотиб кўришди.

Биргина ёш дзюдочимиз Ҳикматулло Тўраев битта ғалабага эриша олди, холос. Иккинчи даврадан курашга қўшилган Тўраев аввалига АҚШ вакили Николос Делпополони мағлуб этди. Лекин иккинчи баҳсида мўғулистонлик Одбаяр Ганбаатарга ютқазиб қўйди.

Терма жамоа таркибидаги энг тажрибали ва шу билан бирга ишонган дзюдочимиз -60 кг вазн тоифасидаги Шарофиддин Лутфуллаев илк даврада россиялик Ислам Яшуевга имкониятни бой бериб, иштирокини тўхтатди.

-66 кг вазнда икки ҳамюртимиз татамига чиқди. Сардор Нуриллаев германиялик Себастьян Седлга, терма жамоа мураббийи Андрей Штурбабиннинг ўғли Артём Штурбабин эса мўғулистонлик Алтансух Довдонга ютқазиб, уйга қуруқ қўл билан қайтадиган бўлди.

Қолган вазнлардаги курашчиларимиз:

-90 кг: Яҳё Имомов

-90 кг: Шермуҳаммад Жандриев

-100 кг: Шерали Жўраев

+100 кг: Алишер Юсупов

+100 кг: Бекмурод Олтибоев