Ҳамид Низамов (Khamid Nizamov): "Бодибилдинг билан шуғулланишни истаган ёшларга муҳим маслаҳатларим бор"

Ҳамюртимиз Михаил Волинкин жаҳонга машҳур "Arnold Classic" мусобақасида мутлоқ ғолибликни қўлга киритиб шахсан Арнольд Шварценеггернинг эътибор тушганидан хабарингиз бор. Юртимизда ушбу спорт турига эътибор, камчилик ва ютуқлар ҳақида Бухоро вилояти бодибилдинг федерацияси раҳбари Ҳамид Низамов билан суҳбатлашдик.

Спорт устаси Ҳамид Низамов 1987 йил Бухоро вилояти Ғиждувон туманида туғилган. 2016 йилда Бухоро вилояти бодибилдинг федерацияси айнан Низамов бошчилигида ташкил этилган ва айни пайтда у федерация раҳбари ҳисобланади. Икки марта Ўзбекистон очиқ чемпионатида 1-ўринни олган. IFBB Осиё чемпионатида 5-ўринни эгаллаган. 2014 ва 2015 йилларда Марказий Осиё ва Қозоғистон чемпионатида Ҳамид Низамов тенгсиз бўлган.

- Бодибилдинг спорт тури билан қачондан буён шуғулланиб келаяпсиз?
- Бу спорт билан 2010 йилдан жиддий шуғулланишни бошлаганман.

- Нима учун айнан шу спорт турини танлагансиз?
- Ёшлигимдан соғлом турмуш тарзини, тўғри овқатланишни ўзимга одат қилганман. Бодибилдинг спорт тури шу нарсаларни ўзида мужассамлаштиргани учун яхши кўраман. Бодибилдинг сўзи таржимаси "тана тузилиши" деганидир. Эркак киши эркаклигидан келиб чиққан ҳолда гавдаси ва мушаклари бақувват бўлиши керак деб ҳисоблайман.

- Тажрибангиздан келиб чиқиб ёш бодибилдингчилар ёки шунчаки қоматига эътибор қилишни хоҳлаган ёшларга қандай маслаҳатлар берасиз?
- Биринчи берадиган маслаҳатим хоҳ у яқинда кириб келган спортчи бўлсин, хоҳ ўз устида ишламоқчи бўлган ҳаваскорлар бўлсин бу спорт тури билан мураббий ёрдамида шуғулланиш керак. Ўзбошимчалик қилиб ёки проффессионал бўлмаган одамларнинг гапига қулоқ солиб, тажриба бўлмаган мураббийлардан маслаҳат олишмасин. Ҳар бир босаётган қадамни тажрибали мураббийлардан сўраш керак. Кўпчилик бунга эътибор бермайди. Жуда кўплаб хатоларга йўл қўйишади. Бу хатолар эса соғлиққа салбий таъсир қилади. Бу қалтис спорт тури ҳисобланади. Ўзининг нозик жиҳатлари бор. Спортчилар қабул қиладиган маълум бир витаминлар бор, таомлари бор.

- Спортчилар учун соғлом таомланиш қанчалик муҳим?
- Бу нотўғри савол. Нафақат спортчилар, оддий одамлар учун ҳам тўғри овқатланиш муҳим. Исталган спорт вакилида тўғри овқатланиш рациони йўлга қўйилмаган бўлса натижаларга ёмон таъсир қилади. Биринчи навбатда қатъий режими бўлиши шарт. Соғлом овқатланиш жуда ҳам муҳим.

- Бухоро вилоятига бу спорт турига эътибор қанчалик? Қандай камчиликлар бор?
- Бухоро вилоятида мазкур спортга эътибор аввалгига қараганда ошиб бормоқда. Вилоятдан етарлича номдор спортчилар чиқишга улгурган. Ўзимни ҳам бир қанча шогирдларим бор. Бухоро вилоятида ёшлар орасида жуда ҳам яхши ривожланиб ва оммалашиб бормоқда. Камчиликлар деярли йўқ. Тошкент билан солиштирганда проффессионал тарзда шуғулланиш учун шароитларга эга бўлган, спорт инвентарлари билан тўлдирилган спорт комплекслари етарлича эмас.

- Бугунги кунда бодибилдинг бўйича Республика миқёсидаги мусобақалар қай тарзда ташкил этилади?
- Мусобақалар яхши, кўтарингки тарзда ташкил этилмоқда. Йилдан-йилга мусобақларнинг сифати ошяпти. Спортчилар сонида ҳам ўсиш бор. Пандемия ҳисобига мусобақалар сони кескин қисқариб кетди. Федерация мусобақаларни максимал даражада яхши ўтказишга ҳаракат қилмоқда.

- Халқаро мусобақалардаги ўзбекистонлик спортчиларнинг иштироклари ҳақида нималар дея оласиз?
- Халқаро мусобақаларда ўзбекистонлик бодибилдингчиларнинг охирги йилларда кўрсатаётган натижалари юқори баҳоланиб келмоқда. Михаил Волинкин деган спортчимиз бор. Ўзимнинг яқин укаларимдан бири. Халқаро турнирлардаги спортчимиз деганда айнан Волинкинни кўрсатсак бўлади. Чунки Осиё ва Жаҳон чемпионатларида, ҳатто "Arnold Classic" мусобақасида ҳам юртимиз байроғини баланд кўтариб келган. Шундан кейин ўзбек бодибилдинги ривожланиши янада кучайди.