"Ҳумо" клубига Россия компанияси ҳомийлик қилиши мумкин

Бу ҳақда Ўзбекистон хоккей федерацияси вице-президенти Баҳодир Ғофуров ТАСС агентлигига маълум қилди.

"Айни пайтда биз асосий ҳомий ёки бир нечта шунга ўхшаш ҳомийларни излаш жараёнидамиз. Бу Россия компанияси бўлиши ҳам мумкин. Албатта, агар бундай компания ёки унинг эгалари санкциялар рўйхатида бўлмаса. Мамлакатимизда ҳам қайси компания бундай ҳамкор бўлиши мумкинлигини кўриб чиқяпмиз", дейди функционер.

"Ҳумо" жамоаси жорий мавсумда мамлакат биринчилигида иштирок этмоқда. Ўтган йили эса "қанотлилар" Қозоғистон чемпионатида қатнашиб, ярим финалгача етиб борганди. Ғофуровнинг сўзларига кўра, мамлакат терма жамоасининг базавий клуби ҳисобланмиш "Ҳумо"нинг Pro Hokei Ligasy (Қозоғистон чемпионати)га қайтиши эҳтимоли ҳам мавжуд.

"Бундай вазиятда ҳомий Қозоғистон ёки Ўзбекистон компанияси бўлиши мумкин, улар учун Қозоғистон ва Ўзбекистон бозорлари қизиқ. Бундан келиб чиқадики, яна сўнгги пайтда барчасига улгуришимизга тўғри келади. Биз буни икки марта бошдан кечирганмиз: 2019 йил ёзида ВХЛга кирганимизда ва кейин Қозоғистон чемпионатида иштирок этишни бошлаганимизда. Бу йил эса тайёргарлик жараёнини камида май ойидан бошлашни, молиялаштириш масаласини аниқлаб олишни, жамоани шакллантиришни ва мавсумга тайёргарлик кўришни истаймиз", дея клуб атрофидаги вазиятга изоҳ берган Баҳодир Ғофуров.

Федерация вице-президентининг қўшимча қилишича, "Ҳумо"нинг ВХЛга қайтиши эҳтимолий харажатлар ошиши сабабли кўриб чиқилмаяпти.

"Бу ерда масала бюджетда. Албатта, бунинг барчаси қимматга тушади. Соф молиявий нуқтаи назардан биз учун энг мақбул вариант — Қозоғистон. У ердаги лига бизга терма жамоани шакллантириш ва ўйин амалиёти масалаларини ҳал қилиш имконини беради", дейди Ғофуров.

2019/20 йилги мавсумда "Ҳумо" ВХЛда иштирок этган ва пандемия сабаб чемпионат тўхтатилганидан сўнг якунда 8-ўринни эгаллаганди.