IBA яна Олимпиаданинг лицензион турнирларини ташкил этишдан четлатилди

Бунга сабаб сифатида яқинда ташкилот президентлиги учун ўтказилган сайловларда йўл қўйилган ҳаракатлар кўрсатилган. 

Май ойида аҳлоқ қўмитаси IBA президентлиги учун сайловда Умар Кремлёвнинг ягона рақобатчиси бўлган голландиялик Борис ван дер Ворстни жараёндан четлатганди. Кейинроқ эса у четлатиш юзасидан Спорт арбитраж судига шикоят қилган ва унинг аризаси қаноатлантирилганди.

Бунга жавобан, IBA сайловларни қайта ташкил этишга тайёрлигини маълум қилган. 18 июнь куни эса Париж Олимпиадаси учун лицензион турнирларни ташкил этиш учун номзодларни танлаш жараёни бошланганди. Бироқ, ХОҚ IBAни ташкилот шаъфелигида ўтадиган лицензион турнирлардан четлатди. 

"Париждаги Олимпия ўйинларида бокс мусобақалари IBA шаъфелигида ўтказилмайди, ҳудди саралаш баҳслари каби. Бокс спорти ва бокс оиласи манфаатлари йўлида биз баҳсларни IBA назорати остида ўтказмасликка қарор қилдик. Биз бокс бўйича лицензион мусобақалар қай тарзда ўтказилиши бўйича ҳали бир қарорга келмадик, лекин баҳслар аниқ IBA билан бирга ўтказилмайди", - деди Халқаро Олимпия қўмитаси спорт директори Кит Макконнелл. 

Эслатиб ўтамиз, Токио Олимпиадаси ва унинг саралаш баҳслари ҳам ХОҚ назорати остида ташкил этилганди.