Икки нуфузли мусобақа олдидан дзюдочиларимиз билан учрашув ўтказилди

Ўзбекистон Миллий олимпия қўмитасида ўтган учрашувнинг асосий мавзуси август ойида дзюдочиларимизни кутиб турган икки асосий мусобақага тайёргарлик ҳақида бўлди.

 4-7 август кунлари Қозоғистон пойтахти Нур-Султан шаҳри катталар ўртасидаги Осиё чемпионатига мезбонлик қилса, 15-17 август кунлари Ислом Бирдамлик ўйинлари дастуридан ўрин олган дзюдо мусобақаси бўлиб ўтади. Ҳар иккала мусобақада Ўзбекистон терма жамоаси аъзолари тўлиқ таркибда иштирок этади. 

Илиас Илиадис мураббийлигидаги Ўзбекистон эркаклар терма жамоаси ушбу нуфузли мусобақаларга Грузиянинг тоғли Бакуриани шаҳрида тайёргарлик кўрди. Марко Шпитка бошчилигидаги аёллар терма жамоамиз эса айни пайтда Исроилнинг Тель-Авив шаҳрида ташкил этилган халқаро ўқув-машғулот йиғинида тайёргарликни маромига етказяпти. Улар билан ҳам МОҚдаги учрашув чоғида ZOOM платформаси орқали боғланиб, мусобақаларнинг аҳамияти тушунтирилди.

Учрашувда Азизжон Камилов ҳар иккала мусобақа нафақат Ўзбекистон дзюдо федерацияси, балки мамлакатимиз спорти учун ҳам ўта муҳимлигини таъкидлади. Айниқса, дзюдочиларимиз ўз тарихида бешинчи бор ташкил этилаётган Ислом Бирдамлик ўйинларидаги иштироки билан Ўзбекистон спорт делегациясининг умумий муваффақиятига катта ҳисса қўшишлари керакли айтилди.