Икки вазнда чемпион бўлган Алекс Перейра учинчи вазнга ўтадими?

У куни кеча оғир вазннинг машҳур жангчиларидан бири Сирил Ган билан face to face маросимида юзма-юз келганди. 

"Айни пайтда бу менинг режаларимга кирмаган", - дея бразилияликнинг сўзларини келтиради MMA Fighting. "Ўзи яқинда яримоғир вазнга ўтдим ва ҳозир ўзимни жуда яхши ҳис қиляпман. Яримоғир вазнда чемпион бўлдим. Демак, тўғри йўлдаман. Шундай экан, яқин орада вазнимни ўзгартирмайман. Ҳозир 36 ёшдаман. Агар танам, аҳмоқ, сен бошқа яримоғир вазнда жанг қила олмайсан" деб айтса, шунда балки оғир вазнга ўтарман".

Эслатиб ўтамиз, Алекс Перейра шу йилнинг апрель ойида ўрта вазн тоифасидаги UFC камарини бой берганди. Реванш жангининг иккинчи раундида Исраэль Адесанья Перейрани нокаутга учратган эди. Шундан кейин бразилиялик яримоғир вазн тоифасига кўтарилди ва даъвогарлар жангида Ян Блаховични ҳакамларнинг айри қарори билан ғалаба қозонди. Ўтган ойда эса у Иржи Прохазкани техник нокаутга учратиб, яримоғир вазн чемпионига айланди.

Алекснинг навбатдаги рақиби ушбу дивизионнинг собиқ чемпиони Жамал Хилл бўлиши мумкин. Шунингдек, Магомед Анкалаев ва Жонни Уокер ўртасидаги жанг ғолиби ҳам Перейранинг рақибига айланиш эҳтимоли бор. Ушбу даъвогарлар жанги 13 январь куни Лас-Вегас шаҳрида ўтказиладиган UFC Fight Night 234 турнирининг асосий тўқнашуви бўлади.